Wednesday, June 4, 2014

Ang 5 Grupong Nadadale ng Racial Stereotypes ng mga Pinoy

Sino sa inyo ang tinatakot ng mga magulang nyo noon na ibebenta kayo sa Bumbay kapag hindi ninyo sinunod ang pinapagawa nila sa inyo? 

Kung wala kayong nakikitang racist sa bagay na iyon, wala rin kayong dapat ikasama ng loob sa lumabas na isyu kelan laang tungkol sa lumalabas sa isang textbook sa Hong Kong kung saan ini-stereotype tayong mga Pinoy bilang mga domestic helper.

Sa isang mundong merong racial harmony,
domestic helper ang Pinoy sa isang British na English teacher.
Naitanong ko na dati sa isang luma kong article kung pikon tayong mga Pinoy at base sa aking obserbasyon e lumalabas na isang tumataginting na oo ang sagot. Madali tayong magreact sa anumang bagay na merong magdadawit ng pangalang Pinoy sa anumang masama - gaya ng isang food review ng Pinoy food na sinulat ng isang travel blogger. Naaalala nyo pa ba ito o nalimutan na dahil merong bago? 

Pero, pakasipin nating lahat: Hindi ba't mga racist rin tayong Pinoy, lalo na sa mga grupong ito? 

1. Indians

Ang tawag natin sa mga taga-India e Bumbay, kahit na alam na ng lahat sa siglong ito na ang Bumbay e pangalan ng bayan sa India. Kungsabagay, mas madali ang tawagin silang Bumbay kesa Indian dahil kapag sinabi sa ating Indian ang naiisip natin e mga taong merong pana at pintura sa muka at kalaban ng mga koboy. 

Pagkabasa nyo ng Bumbay, alin sa mga ito ang unang pumasok sa isip nyo?
  • payb-siks (5-6)
  • pahulugang gamit
  • motorsiklo at payong na itim na combo
  • panakot sa bata


Hindi ba't panakot sa ating mga bata ang Bumbay noon dahil kakaiba ang itsura nila? Katunayan, kahit hanggang ngayon panakot pa rin ang mga Bumbay. 

Tatlong taon pa laang ang anak ko noon nung nagbakasyon kami sa Pilipinas. Malikot ang anak ko't ayaw nyang sundin ang temporary sub na yaya. Nung tinanong ko ang yaya kung bakit hinayaan nyang magtatakbo ang anak ko sa mall, ang sagot nya sa akin e: 
"Ayaw pong sumunod, kahit pa sinabihan ko nang kukunin sya ng BUMBAY." -Inday (Oo, Inday talaga ang tawag sa kanya.)
Wala pang konspeto ng Bumbay ang anak ko at sa isang sub na yaya, makatwiran laang na gamitin itong panakot para sumunod ang isang bata. Ewan ko, siguro masyado pang maaga ang DDA o dagat-dagatang apoy bilang panakot. 

Ating i-flash forward sa noong sya e mga apat-limang taon na at nagkaroon kami ng bisitang Malaysiang Bumbay na napakatangkad at ang balat e mala-budhi ng isang pulitiko sa itim. Hindi ko ginagamit na panakot ang Bumbay sa aking anak, pero meroon yatang pinag-uugatang pang-unawa sa utak ng mga sinaunang tao, ng mga caveman, na ang mga Bumbay e dapat katakutan. 

Magtago na ang hindi pa nakakapaghulog.
Hindi ko sinasabing nag-evolve sila mula sa mga kapre, pero paano at bakit ganoon na laang ang silakbot na humablot sa puso ng anak kong halos ipatawas ko na noon para laang tumahan sa pag-iyak dahil nakita nya ang bisita kong si Gopi?

Sa ngayon e pitong taon na ang anak ko. Meron kaming kaibigang Bumbay na pumupunta sa amin paminsan-minsan, hindi para maningil ng pahulugang ref, kundi para makitambay. Hindi naman natatakot ang anak ko. Pero, sa tuwing nakakakita sya ng Bumbay sa TV, Mr Pitchay ang tawag niya, dahil malamang e pare-pareho laang sa paningin nya ang kanilang itsura.

2. Chinese

Gaanong karami ang mga kaibigan nating lahing Chinese o Filipino-Chinese? Karaniwan na ito sa atin. Hindi na natin naiisip ang kanilang pagka-Chinese. Hindi gaya ng mga Bumbay, hindi na gaanong nadidiscriminate ang Filipino-Chinese community. Niyakap rin natin ang kanilang kultura at nakikihalo tayo sa mga Mooncake Festival, Chinese New Year, punsoy, Chinese zodiac, ang multilogy ng Mano Po, atbp.

Naging pangunahing target pa sila noong mga late 90s ng kidnapping dahil iniisip na mayayaman sila, pero mukang hindi na uso ngayon. 

Hindi na rin ako nakakakita ng mga tauhan sa TV o pelikula na kung magsalita e ganito: "Loke na nekosyo!" 

Noon kapag umakyat ka ng ligaw nang tanghali e makakarinig ka ng ganito: "Tanghaling tapat aakyat ka ng ligaw? Ano ka, Instek?" Siguro dahil hindi na uso ang pag-akyat ng ligaw.

Sa tingin ko naman e wala na ngayong naniniwalang ipinapalaman nila sa siopao ang pusa o ang tumatawag sa tsampoy na kulangot ng Intsek. Swerte na rin sila kumpara sa mga Bumbay. 


Sa ngayon, ang tanging alam ko laang na parang discrimination sa kanila e ang pagtawag sa kanila ng Intsik o Intsek at lalung-lalo na ang Tsekwa o Beho. Ewan ko, noong ako e bata pa e akala ko e Intsek ang Tagalog ng Chinese at hindi ko maintindihan nung ako e lumalaki kung bakit itinuturing nilang racial slur ito. O kaya ang Tsekwa? 

Meron nga sa aming bayan, ang palayaw e Intsek dahil singkit ang mga mata at Beho ang palayaw ng lalaki nyang anak, kahit na wala silang lahing Chinese. 

Kung meron mang problema ngayon sa kanila, ito e dahil sa namumuong hidwaan sa kanila dahil sa Spratlys. At ang poot na ito e hindi pa sa mga kapatid nating Tsinoy, kung hindi 'yung tunay na taga-China.  

Teka, ano nga ba ang Tagalog sa Chinese? Tsino ba? Bukod sa elementary textbook namin noon e wala pa akong narinig na gumamit 

3. Black Americans (African-Americans)

Sino sa inyo ang nakikikanta noong bata ng "We wish you Amerikano and a Happy Negro" kapag Pasko kahit hindi naman magkalapit ang tunog ng "New Year' at 'negro'? Na parang hindi Amerkano ang isang black American. 

Sino sa inyo ang hanggang ngayon kapag nakakita ng Caucasian o Puti e ang tawag e Kano, kahit na sila e British o Australian, pero negro, nognog, egot o egoy ang tawag sa isang itim kahit pa ito e Amerkano?

Ilan sa inyo, nung kasagsagan ng Mayweather-Pacquiao rivalry, e hindi nakitawag ng negro, egot o egoy ke Mayweather nung ayaw nitong lumaban ke Pacman?


Nabawasan na rin ang ganitong pagtingin sa mga blacks sa kasalukuyang panahon, dahil malamang sa NBA at hip hop music, pero sa tingin mo gaanong karaming Pinoy sa mga kakilala mo ang papayag na makasal ang dalaga nila sa isang black? 

4. Muslim

Ilan sa inyo ang automatic na Muslim ang tawag o ibinibigay na palayaw sa isang Muslim (sa labas ng Mindanao), pero hindi naman tinatawag na Kristyano ang isang Kristyano kahit na ang pangalan nito e Christian? 
Best friend mo sila 'pag meron kang hinahanap na hard-to-find na title.
Ilan sa inyo ang sa tuwing nakakakita ng Muslim e bumubulong sa sarili ng "dibidi, dibidi", pero hindi masabi nang harapan sa takot na mapatay nila? Ilan sa inyo ang takot sa Muslim at sa tingin e maghuhuramentado ito kapag nagalit? 

Nung isang beses noong ako nasa Pilipinas pa e nagsuot ako ng kupya o 'yung Muslim headdress para sa lalaki nung sumakay ako sa bukanang upuan sa bus. Sa maniwala kayo o hinde, e ako ang huling tinabihan sa upuan ng mga tao roon dahil natatakot sa akin malamang. Maaaring sabihin nyong, kahit naman wala akong suot na ganun e hindi pa rin ako tatabihan dahil sa itsura ko. 

Mag-aanim na taon na ako rito sa Indonesia at masasabi kong ang mga nakakasalamuha kong mga Muslim rito e mapagpasensya, matulungin at malamig ang mga ulo. Kapag nagkakaroon ng banggaan o nagkakasagian ng kotse, mga nakangiti laang silang bumababa ng sasakyan at nag-uusap. Hindi ko ma-imagine sa Pilipinas ang ganitong senaryo. Malayung-malayo sa war freak na stereotype sa atin. 

5. Bisaya

Sa tingin ko e natanggal na ang label na promdi, probinsyano o syano dahil sa dami ng mga taga-Maynilang tubong probinsya. Wala na akong nakikitang pelikulang kung saan ang probinsyanong bagong-salta sa Maynila e nakabakya, merong dalang tandang at bitbit na bayong. 
Ala eh, 'ala na rin yatang natatawa sa mga punto ng Batanggenyo, Kabitenyo o Kafamfangan? Ang tanging natitira't hindi pa nakakawala sa ganito e ang mga Bisaya. Hanggang ngayon e tampulan pa rin sila ng biruan kapag sila e nagtatagalog, kahit pa isa kagaya ni Manny Pacquiao na kayang bilhin ang kaluluwa mo sa yaman at kayang pulbusin ang bungo mo ng isang sapok. Hanggang ngayon e meron pa ring kinakikitaan ng komedya ang kanilang pagbigkas ng mga sinasabi nila. 
Biruin mo nga siya nang harapan para malaman mo
 kung ano ang ibig sabihin ng punchline.
Bukod run, ang iniisip agad natin kapag Bisaya e mga tipong nagtatarbaho bilang kargador sa pier, panadero, katulong (See, tayo rin nambabansag ng DH sa kapwa natin?), at iba pang menial, pero marangal na tarbaho. Kahit na totoo naman e mga taga-iba't ibang panig ng Pilipinas sila nanggaling. 

Hindi kaya't tayo mismo e isa sa mga nuknukan ng racist na lipi sa mundo kapag ganyang kababayan natin e ini-stereotype natin nang gay-an? 

Pero, merong malaking pinagkaiba ang sa atin: biro laang ito kalimitan, pero 'yung sa exercise sa textbook na lumabas sa HK e itinuturo sa mga bata sa eskwelahan. Para sa iyo, nakakapikon ba ang stereotype na ito?


10 comments:

  1. Maari ngang biro lamang natin iyon - pero sa aking pag-aaral, ay may pinag-ugatang mga kaugalian o "insecurity" na dala pa ng ating mga ninuno at naipasa sa atin. Hindi lang naman Bisaya ang grupong etniko na ating pinapatungan ng mga stereotype at mahinahong "racism". Sa aking palagay ay nariyan ang mga isyo tulad ng mga ethnic conflicts bago pa man dumating ang mga kastila. Ngunit hindi buo ang aking pagresearch dito.

    ReplyDelete
    Replies
    1. Isang pinag-uugatan niyan e colonila mentality. Mabentang-mabenta ang mga whitening lotions, pagpapatangos ng ilong, etc. Anumang wala sa sentro ng maynila noon e iniisip na inferior.

      Ang isa sa mga una kong isinulat, pero pinagpasyahang tanggalin na rin e ang stereotyping sa mga kung tawagin e Igorot. Hindi ko laang matandaan knug sinong celeb 'yung nalintikan sa kanyang sinabi tungkol sa kanila at akala e wala pang internet doon o cell sites.

      Delete
  2. Sa pagkakatanda ko, si Cynthia Patag yun na nagbitaw ng biro sa mga Igorot na ikinapikon nila. Mahilig din naman talagang mag-stereo type ang mga Pinoy. Pero pag sa atin ginagawa ay napakadali nating mapikon, na kesyo nilalait ang pagka-Pilipino natin. Para bang may mabanggit lang ang ibang lahi sa atin na di maganda sa pandinig ay todo react na agad ang marami sa atin. Nakapagpaliwanag na naman yung publisher ba 'yun o writer ng textbook sa Hongkong. Marangal naman pala ang tingin nila sa mga DH. Para siguro maiwasan ang ganitong mga taguri ay dapat itaas ng gobyerno ang antas ng pamumuhay ng mga Pilipino para wala nang magdi-DH, magma-mason atbp. Kung meron man sana ay mga pawang professional na lang. Pero wish ko lang hehe.

    ReplyDelete
  3. nasasaktan mga pinoy jan kase tayong mga pinoy mismo mababa ang tingin sa trabahong DH, kaya pag nasabihang DH ang mga pinoy (na totoo naman sa dami ng DH sa HK) nasasaktan ang mga pinoy sa pinas, dahil tayo mismo mababa ang tingin sa mga DH.

    ReplyDelete
    Replies
    1. Tama ka, nasa paningin kasi nating ganun e. Sa atin nga kapag napagkamalang saleslady sa isang mall at pinagtanungan ng presyo parang naooffend na agad.

      Delete
  4. Sorry, si Candy Pangilinan pala yung nagbiro ng tungkol sa Igorot hehe

    ReplyDelete
  5. Saklap naman ng picture... "I am a domestic helper" talaga... XD

    probinsiyana

    ReplyDelete
    Replies
    1. At least maganda ang pagkacartoon sa atin. Hindi panget ang features. Hehe.

      Delete
  6. On Moon Bitcoin you may recieve free satoshis. 29 sat. every 5 minutes.

    ReplyDelete